Keshi Yená

Keshi yená, un plato ku balor históriko ku lo laga boka kore awa

Bo tabata sa ku tin mas ku 650 tipo di keshi na mundu?

Definitivamente keshi ta un ingrediente mágiko. Pa di promé, e tin un variashon grandi di sabor. Banda di esaki, keshi su tekstura ta úniko i bo por inkorpor’é diferentemente manera den un menú. Bo por usa keshi komo sous, un ‘tòpin’ òf parti prinsipal di bo kuminda. Ta probá ku mas bo komé, mas bo ke. Awor, tin dos tipo di hende, esun ku ta kome keshi i esun ku no por resistí keshi. Si abo ta kai den e di dos grupo, e kurso akí bo no por pèrdé. Itel Cicilia ta bai kompartí ku bo su reseta di keshi yená. Itel ta un kòki profeshonal ku tin mas ku 50 aña di eksperiensia. El a traha na diferente restorant i hotèl renombrá, tantu na Kòrsou komo den eksterior. Keshi yená semper tabata un di Itel su platonan faborito. E reseta klásiko akí ta originá for di den tempu ku kuminda ainda tabata hopi skars i keshi tabata bini Kòrsou ku barku di bela. Bo por komprondé dikon e plato aki tin un balor históriko? Pues sea ku bo ta riba nivel di eksperto kaba òf bo ta un nobato den kushina, e reseta akí sigur meresé bo atenshon.

Loke bo ta bai siña ta:

· Un reseta históriko ku lo bo por ‘pasa over’ pa bo generashon

· E sekuensha korekto pa agregá kada un ingrediente pa asina e sabor di bo karni ta bon balansá

· Kon pa kushiná e karni di manera ku e no ta sali papa ni tampoko muchu seku.

· E téknika ideal pa evitá ku bo keshi yená ta smèlt, pega òf bira duru.

Konosementu

· Pa por sigui e kurso akí, no ta rekerí konosementu avansá di kushina. Tur paso ta ser spliká di un manera fásil i komprendibel

Kurso aki ta inkluí

· Video ku durashon di 19 minüt i 12 sekònde

· Akseso ilimitá na video

· Akseso via telefòn selular i kòmpüter